Nga Ndoc Selimi /
Qazim Mulleti u lind në Tiranë më 20 dhjetor 1893. Studimet e para i mori në Manastir dhe më pas vazhdoi gjimnazin “Zosimea” të Janinës dhe kryen studimet e larta në Kolegjin Perandorak të Stambollit “Gallata Saraj” me medalje ari. Ai mësoi shumë gjuhë të huaja si turqisht, greqisht, gjermanisht, frangjisht, italisht e latinisht. Më 1914 vazhdon studimet në Vjenë në fushën e diplomacisë ushtarake. Më 1920 merr pjesë në Kongresin e Lushnjes. Ishte ai që argumenton pse duhet të ishte Tirana kryeqyteti i ardhëshëm i Shqipërisë. Mulleti bëhet komandant i Forcave vullnetare që luftuan kundër Serbisë në shtator të vitit 1920. Në qeverinë e Nolit bëhet Prefekt në Dibër por pas dështimit te revolucionit nolian, vendoset në Vjenë. Atje ai njihet me Hajrijen, (bashkëshorten e ardhëshme) e cila ishte emigrante antizogiste në Austri. Në vitin 1931 Qazim Mulleti ishte nga njerëzit kryesorë që përgatitën atentatin kundër Zogut në Vjenë, që i ishte ngarkuar kapiten Azis Camit dhe toger Ndok Gjeloshit.
Me pushtimin fashist Qazim Mulleti kthehet në Shqipëri. Gënjehet pas fashizmit si edhe shumë figura të tjera të asaj kohe duke menduar gjithnjë për krijimin e Shqipërisë Reale, në atë kohë e vendosur në program prej fashizmit. Ai bëhet Prefekt i Tiranës. Mulleti ishte armik i komunistëve të cilët i konsideronte prorusë. Pasi sheh se lufta merr kundër idealeve të tij, Qazimi ikën përsëri në emigracion, por këtë radhë për të mos u kthyer më kurrë. Ai vdes më 28 gusht 1956 Romë, ndërsa e shoqja bashkë me të birin Reshitin provon vuajtjen për 45 vjet nëpër kampet e përqëndrimit të Shqipërisë, derisa Hajrija vdes e persekutuar dhe e harruar në vitet 80′ në Savra, Lushnje.
