Karl Gurakuqi lindi në Shkodër me 24 mars 1895. Shkollimin fillor e bëri në shkollën Françeskane ku filloi edhe të mesmen, që e mbaroi në Salzburg, e më pas kreu fakultetin e filozofisë në Gratz. Shërbeu vijimisht në arsimin kombëtar që nga viti 1917 për 27 vjet rresht, më të shumtën si profesor gjuhësije; inspektor arsimi në Vlorë, Shef Seksioni në Ministrinë e Arsimit, drejtor liceu, anëtar i Komisionit Teknik, profesor i shqipes dhe i latinishtes në Institutin femëror “Nana e Skandërbeut”, në Tiranë, etj. Sekretar i Përgjithshëm i Federatës “Atdheu” (Vlorë, 1921-1922), Inspektor Epror pranë Ministrisë së Arsimit dhe ishte pjesëtar efektiv i Institutit të Studimeve Shqiptare deri më 1944. Ishte sekretar i “Komisis Letrare” (1914-1917) ; Inspektor arsimi në Vlorë (1921-1922). Mbas përfundimit të Luftës së dytë Botërore, Karl Gurakuqi u largua për në Itali.
Në Itali bashkëpunoi me revistën “Shêjzat” të Koliqit. Gurakuqi botoi në këtë organ rreth 100 shkrime. Pas vitit 1944 nuk u kthye më në Shqipëri. Ai jetoi në Itali (Palermo) ku shërbeu si profesor në Universitetin e Palermos; bashkëthemeloi Qendrën Ndërkombëtare të Studimeve Shqiptare me R. Petrotten e G. Valentinin që e bëri Palermon qendrën më të rëndësishme albanologjike të kohës me konferencat e botimet.
Megjithëse jetoi 27 vjet larg atdheut, Karl Gurakuqi nuk mori nënshtetësinë e asnjë shteti të huaj. Më 1957 emërohet këshilltar i Komitetit “Shqipëria e Lirë” drejtuar nga Rexhep Krasniqi, bashkë me Mehdi Frashërin dhe Ali Këlcyrën. Në Austri mori pjesë në hartimin e skedarit të madh të fjalorit të shqipes me shpjegime në gjermanisht për Akademinë e Shkencave të Austrisë.
Në fund të jetës qendroi pranë të birit, Gilbert në Bressanone (Bolzano). Karl Gurakuqi vdiq në Palermo më 6 dhjetor 1971.
Veprimtari:
Drejtor i të përkohëshmeve: “Agimi” (1920-1922),
“Revista Pedagogjike” (1925-1927),
“Mësuesi”, (1928),
“Shkolla kombëtare” (1938)
Redaktuar i revistave: “Atdheu”,
“Illyria” (në periudhën e dytë, (1935-1936), ku botoi në 36 “Fjalorth fjalësh të rralla me shpjegime”.(1935-1936)
Botime:
“Libër leximi”, për shkolla të mesme me Mati Logorecin e L. Naraçin (1920) ;
“Gjenovefa” dramë 5 veprimesh, me L. Naraçin (1921) ;
“Ilirët” nga Dr. Karl Patsch (1923);
“Ditunija gjuhore indogjermane” nga Dr. Paul Kretschmer (1923); “Zemra” nga Edmondo de Amicis (1924 e 1932) ;
“Gjendja ekonomike e kulturore e Shqipnís në kohën e kalueme” nga Dr. Karl Patsch (1925) ;
“Serbët dhe Shqiptarët” nga Dr. Milan Sufflay me Z. Fekeçin (1926) ;
“Rrjedhja e punëve në Shqipní” nga Alfred Rappaport (1928) ; “Lule” roman historik i gjermanit Fabjan Barcata (1930) ;
“Si u shkaktue lufta e Madhe” nga Dr. A. Wegerer (1931) ; “Visaret e Kombit” vëllim I dhe “Visaret e Kombit” vëllim III në bashkëpunim me Filip Fishtën (1937) ;
“Gramatikë latine” (1938) ;
“Ushtrimet e gramatikës latine” (1938) ;
“Syntaksa latine” (1939) ;
“Visaret e Kombit” vëllim IV (1939) ;
“Te praku i jetës” (1940)
“Rreze Drite” (1941) nën kujdesin e Ernest Koliqit në bashkëpunim me Kolë Kamsin ;
“Historija e letërsis romake” nga F. Vivona (1941), etj.
