Ministria e Kulturës njofton se më dt 17 17 shkurt, ora 11:00, do të zhvillohet Ceremonia e dhurimit të Arkivës “Foto Studio Kallfa” në Tiranë me fotografët vëllezërit Mehmet dhe Osman Kallfa, për Fototekën Kombëtare “Marubi” në Shkodër.
Kjo arkivë, dhuruar nga Pllum Kallfa, djali i fotografit Mehmet Kallfa, do ti bashkangjitet inventarit të Fototekës Kombëtare “Marubi” në Shkodër dhe përmban gjithsej 2272 dokumente fotografike dhe 8 objekte të tjera të “Foto Studio Kallfa”, gjithsej 2280.
Arkivi është i pasur me : Film në negativ, fotografi në pozitiv, aparat fotografik “Praktica PLC 2”, “Kodak Vollenta 620”, stativ i aparatit të vjetër “Lamperti & Carbagnati”, Milano, aparat fotografik i vjetër me objektiv “SCHNEIDER – KREUZNACH, etj.
Mehmet Kallfa punoi si fotoreporter pranë Agjencisë Telegrafike Shqiptare gjatë viteve 1944 – 1957 dhe për pak kohë ai punoi dhe si operator pranë Kinostudios “Shqipëria e re”. Pas 1957, e deri në fund të jetës së tij ai punoi pranë sektorit të arkeologjisë në Universitetin e Tiranës.
Arkivi i tij është mjaft i pasur me fotografi që dëshmojnë momente të rëndësishme të historisë së Shqipërisë së atyre viteve por dhe të jetës social-ekonomike. Ndër momentet më të rëndësishme që ai fotografoi janë: Hyrja e qeverisë komuniste në Tiranë më 28 nëntor 1944, vizita e Nikita Hrushovit në Shqipëri dhe fotografi të tjera të manifestimeve, pleniumeve dhe kongreseve të para të Partisë Komuniste. Krahas këtyre fotografive, më të njohurat mbeten ato të publikuara në albumin e parë për arkeologjinë, “Shqipëria arkeologjike” e vitit 1971.
